Ua bona part der airau de distribucion der os coincidís damb es resèrves nacionaus de caça, airaus privadi de caça e zònes de caça contarotlada, çò qu’obligue a extremar es precaucions entà evitar accidents non desiradi o ben molèsties o perjudicis ara espècia, e a trabalhar enn compatibilitat dera gestion der os brun damb era mantenença dera activitat cinegetica.

Eth sanglièr ei era espècia que pòt portar mès problèmes d’interferéncia damb er os. Hèn concorréncia pera neuritud, e donques es  densitats nautes de sanglièr pòden èster perjudiciaus entar os brun. En aguest sens, era caça deth sanglièr ei beneficiosa entara conservacion der os, mès cau préner ues mesures especiaus entà evitar accidents e non ocasionar afligéncies ar os.

Per aguesta arrason, s’amien a tèrme talhèrs de cooperacion damb caçaires e se trabalhe ena elaboracion d’un manuau de bones practiques acordat per consensus damb eth collectiu de caçaires deth territòri qu’endevie un estrument de guida sus se com practicar era activitat cinegetica enes airaus critics de conservacion der os.