Eth projècte PirosLIFE Catalunya s’enquadre enes programes Life-Natura, er objectiu des quaus ei contribuïr ara aplicacion dera directiva comunitària relativa ara conservacion dera natura entà mantier e mielhorar es abitats naturaus e es espècies animaus e vegetaus d’interès comunitari des espacis designats laguens dera Xarxa Natura 2000.

Eth Programa LIFE ei er unic esturment financèr dera Union Europèa dedicat, de forma exclusiva, ath miei ambient. Eth sòn objectiu generau ei contribuïr ath desvolopament, era aplicacion e actualizacion dera legislacion comunitària en matèria de miei ambient integrant-la enes politiques mieiambientaus intèrnes des estats membres.

La Xarxa Natura 2000 intègre un conjut d’espacis naturaus que s’an concebut entà frenar era pèrta de riquesa biologica e entà combàter eth deteriorament des recorsi naturaus deth territòri europèu. Er hilat espanhòu quedèc constituït en Estat espanhòu en noveme de 2006.

Ei un hilat ecologic europèu d’airaus de conservacion dera biodiversitat. Era degradacion continuada des abitats naturaus e es menaces sus determinades espècies constituïssen ua preocupacion primordiau dera politica de miei ambient dera union Europèa, e per aquerò era Directiva 92/43/CEE sus era conservacion des abitats naturaus de fauna e flòra sauvatges (Directiva Abitats), de 21 de mai de 1992 preten contribuïr ath manteniment dera biodiversitat enes Estats membres, definint un marc comun entara conservacion des abitats e era fauna e era flòra d’interès comunitari. Per açò se creèc era Xarxa Natura 2000, eth hilat ecologic mès gran deth mon, qu’includís airaus especiaus de conservacion designadi pes Estats membres e airaus especiaus de proteccion establidi en vertut dera Directiva Aus 2009/147/CE.

Es annèxes I e II dera Directiva remassen eth tipe d’abitats e es espècies que requerissen designacion d’airaus especiaus de conservacion. Er annèxe IV, a mès, definís es tipes d’abitats o d’espècies prioritàries (en perilh d’extincion) e que requerissen ua proteccion estricta. Er Estat espanhòu ei eth país europèu que mès superficia includís ena Xarxa Natura 2000, pr’amor dera grana biodiversitat d’abitats e d’espècies. Catalonha, tamb 123 espacis e ua superfícia totau de 9.772,24 km², represente eth 30% deth totau deth territòri .