Quauques tralhes der os brun son fòrça caracteristiques, e, se los rescontram ena montanha, facilaments poderam identificar eth sòn  pas peth territòri. D’auti indicis non son pas tan aisits d’identificar.

Es peades son uniques pera mesura, pera forma e pera mèrca des cinc dits. Se semblen es deth taishon, totun mès grani e damb un dit de mès. Es peades des pautes de darrèr son coma es des umans; mèrquen claraments tota era planta e es cinc dits e es ungles. Era pauta de deuant mèrque era part anteriora dera planta e a viatges eth talon arredonit. Es peades son d’ua largor de 10 a 15 cm.

Peades d’os

Peades d’os 

Peada d’os ath costat de peades de vop

Era forma e era mesura des excrements ei fòrça variabla e depen principauments dera alimentacion der individú. S’a minjat carn, son mèslèu alongadi e damb peus e damb ua fòrta aulor desagradabla; quan mingen èrba, son diuèrsi e arredonits, toti pleï d’èrbes e de bères rèstes d’insèctes e damb melhora aulor. E, quan minge fruts secs e semes, contien nombroses rèstes de casquelhs de semes e son cilindrics e damb un gran diamètre.

Excrement d’os damb ingestion de fruts

Tanben se pòden observar mèrques o engarrapades enes troncs entre es 30 cm e es 2 m de nautada; los mossegen o los graten en tot deishar mèrques de 3 a 4 ungles.
Es hormiguères o nids de vèspes estrossejadi e pèires fòrça granes arrevirades tanben son indicis deth pas der os, e tanben petites excavacions arredonides  recubèrtes damb un lhet d’èrba e plaçades en lòcs pòc accessibles. En aqueri lòcs ei freqüent de trobar peus d’os.