Era principau causa dera regression e extincion der os en Catalonha e en bona part des Pirenèus ei era persecucion umana, ja ben sigue tamb armes de huec, tamb params o tamb podons. Cau rebrembar qu’er os ei protegit des der an 1973. Totun, pendent eth periòde 1972-1992 se calcule que s’auciren uns 25 ossi enes dus versants des Pirenèus, francés e iberic.

A finaus dera decada des ans 1980 era populacion pirinenca arribèc en un estat de non retorn, qu’acabèc tamb era mòrt naturau d’un mascle vielh de 29 ans, Papillon, e era mòrt per tir dera darrèra femelha, Canelle, toti dus en 2004. En 2010 desapareishec eth darrèr exemplar cent per cent pirenenc, Camille.

Unicament un projècte de reintroduccion poderie retornar aguesta espècia tath Pirenèu. Per aguesta rason, er an 1996 comencèc un programa pilòt (liberament de dues femelhes en 1996 e un mascle en 1997) entà comprovar era aclimatacion d’aqueri animaus, tamb era ajuda deth programa LIFE dera Union Europèa, amiat a tèrme peth Govèrn de França tamb era collaboracion deth Govèrn catalan. Posteriorament se contunhèc tamb eth liberament de 4 femelhes e un mascle er an 2006.