Ua delegacion formada per personau de diuèrses administracions pirenenques visitèc dues zònes d’Itàlia damb preséncia d’os ròi: eth Trentino e es Abruzzos. Concrètament, i participèren agents, personau tecnic e cargues elèctes deth Conselh Generau d’Aran, dera Generalitat de Catalunya (Forestau Catalana e Còs d’Agents Ruraus) e efectius deth Còs de Bandèrs deth Govèrn d’Andòrra. Er objectiu der escambi ère conéisher de prumèra man diuèrses manères de gestionar poblacions d’ossi en zònes semblantes en Pirenèu; zònes montanhoses fòrça abitades deth sud d’Euròpa.
Es principaus linhes de trebalh que se tractèren sigueren era gestion d’ossi conflictius (classificacion, aplicacion de mesures aversives, cans de horaget, captura, extraccion…), era prevencion des danhs e d’auti aspèctes sus era demografia des poblacions e era comunicacion. Se visitèren punts e coneisheren metòdes de trampeg, zònes de peisheu damb mesures de proteccion de ramats, e tanben es cabanes e es bòrdes de montanha, barratges de reclusion d’ossi conflictius, etc.
