Eth Parc Naturau deth Naut Pirenèu e eth Grèmi dera Husta e deth Mòble an organizat un camp de trabalh e d’aprendissatge entà rebastir era naua cabana de pastor d’Estanilles, ena montanha de Boldís, en Lladorre (Palhars Sobeiran). Eth refugi anterior patic un incendi en seteme passat e calec plaçar-i d’urgéncia un barracòt portatil que se retirèc ena tardor, quan acabèc eth gropament des arramats ovins.

Un grop de vint volontaris trabalharàn en dus torns, entre eth 10 e eth 23 de junhsèga, en tot bastir era cabana, dessenhada per arquitècte especializat en bastiments sostenibles Josep Bunyesc, damb husta locau dera enterpresa Hustes Sebastia. Era realizacion tecnica anarà a cargue der expèrt norvegian en aqueth tipe d’edificacions Mats Yri. Era estructura se realizarà dessús des fondaments de pèira existenti, s’isolaràn es revestiments interiors e exteriors dera façada ventilada, se plaçaràn pòrta e hièstres, plaques solares e ua installacion electrica basica. Tot eth materiau arribarà en elicoptèr enquiath camp de trabalh, a quauqui 2.300 mètres de nautada.

Era bòrcabana-2da sinistrada l’auie promoiguda era entitat Acciónatura en estiu de 2015, coma ua accion complementària deth programa LIFE+ Piroslife, de consolidacion dera poblacion d’os brun enes Pirenèus centraus, e que promò compatibilizar era ramaderia e era preséncia der animau. Aqueth nau refugi de pastor lo gerís era Generalitat e ei cofinançat pera Union Europèa.

Eth pastor d’Estanilles susvelhe uns mil caps de bestiau ovin de diferenti pagesi dera Val de Cardós, que pèishen pendent er estiu en zòna de preséncia contunhada der os brun. Eth bastiment permet de gerir melhor es peisheus a on demoren es oelhes en aguesta sason, en tot amendrir es desplaçaments diadèrs deth bestiau, e capère as pagesi des pòbles de Boldís Jussà e Sobirà (Lladorre), quan s’aucupen deth bestiau bovin e equin.