• Tecnicians deth Còrs d’Agents Ruraus, deth Conselh Generau d’Aran, deth Departament de Territòri e Sostenibilitat e de Forestau Catalana an participat a un operatiu especiau de captura der animau, dempús qu’era setmana passada tornèsse tà Catalonha
  •  An emplegat er elicoptèr deth Còrs d’Agents Ruraus entà apropar-se ar animau e dromir-lo, prener-li mòstres e cambiar-li eth colar GPS, pr’amor qu’era bateria ère ath limit dera sua vida utila

 

Tecnicians deth Còrs d’Agents Ruraus, deth Conselh Generau d’Aran, deth Departament de Territòri e Sostenibilitat, e de Forestau Catalana participèren ager en un dispositiu especiau de captura der os Goiat entà cambiar-li eth colar de seguiment GPS, tau e coma ère previst, en encastre deth projècte Piroslife.

Era intervencion, que se debanèc ena zòna de Naut Aran, s’amièc a tèrme damb eth supòrt de membres deth Còrs des Agents Ruraus. Mejançant eth sòn elicoptèr, se podec efectuar eth seguiment visuau der animau, era manòbra d’aproximacion, atau coma eth trèt damb un rifle anestesic. Dempús de dromir-lo, es tecnicians li poderen trèir mòstres e cambiar-li eth colar, pr’amor qu’era bateria ère apròp d’agotar-se. Atau, eth seguiment GPS der animau demore garantit coma enquia ara. Dempús, er animau se desvelhèc e se verifiquèc eth corrècte foncionament deth nau dispositiu de seguiment.

Era captura s’a amiat a bon tèrme damb era participacion d’ua equipa de 15 persones. Ei eth prumèr còp enes Pirenèus que se realize ua captura d’os per mejans aeriani.

Se preve qu’enes setmanes a vier es ossi comencen eth periòde d’iuernacion, en tot coïncidir damb era baishada des temperatures. En parallel, se trabalhe ena elaboracion d’un protocòu d’intervencion e gestion d’ossi problematics enes Pirenèus damb era rèsta des comunautats autonòmes concernides. S’agís d’un document tecnic e de consens qu’a de guidar era prenuda de decisions en aqueth encastre.

Podetz descargar es imatges ací.