En 2015 i auie 29 exemplars d’os brun identificadi enes Pirenèus, de diuèrsa procedéncia e distribuïdi en dus nuclèus:

• Nuclèu occidentau, que se tròbe ath sud deth departament francés des Pirenèus Atlantics, ath nòrd-èst de Navarra e ath nòrd-oèst d’Òsca. Solament i a dus exemplars mascles; un ei Nere e er aute eth sòn hilh Cannellito. Nere, neishut en 1997, partic er an 2000 deth nuclèu centrau ath nuclèu occidentau. Cannellito neishec en 2004, frut dera femelha autoctòna Caramelles e de Nere. Posterioraments un caçaire francés aucic a sa mair. Donques, Cannellito ei er unic os brun actuau descendent deth linhatge pirenenc, mès ath 50%.
• Nuclèu centrau, format per ua populacion de procedéncia eslovena, a compdar des ossi liberadi enes ans 1996, 1997 e 2006. Se tròbe ath sud des departaments francesi dera Nauta Garona e Arièja, ath nòrd-èst d’Òsca e enes comarques catalanes dera Val d’Aran e eth Palhars Sobeiran principauments, mès tanben en Palhars Jusan, era Nauta Ribagòrça e eth Naut Urgèlh. En 2016 se liberèc ath mascle Goiat.

Damb es donades obtengudes e damb eth tipe de metodologia utilizada (arratères de peus, sistèmes automatics de fotografia e vidèo, observacions, damatges e depredacions, indicis e tralhes, eca.) ei complicat d’estimar era populacion d’ossi que i a enes Pirenèus, totun se’n pòt hèr ua aproximacion.

A compdar des donades obtengudes des analisis genetiques, des sistèmes automatics de fotografia e vidèo e des observacions visuaus, es exemplars identificadi pendent er an 2015 son:

• 7 mascles adults: Pyros, Moonboots, Bonabé, Canellito, Nere, Pélut, Pepito.
• 10 femelhes adultes: Sarousse, Caramellita, Caramelles, Hvala, Bambou, Boavi, Callista ,Fadeta, Isil, Plume.
• 6 josadults: Chataigne, Gaïa, S26Slo1, Boet, Esmolet, S25Slo1
• 6 ossardets der an, neishudi en 2015: S27Slo1, S26Slo2 e 4 d’indeterminadi.

Reproduccion recenta

Pendent er an 2014 se detectèren cinc casi de reproduccion. Era femelha Fadeta damb un ossardet femelha (Aubèrta), hilha de Pyros. Era femelha Bambou damb un ossardet (S25SLO1), hilh de Moonboots. Era femelha Nhèu damb un ossardet (S26SLO1= Réglisse), hilh de Moonboots. Era femelha Boavi, damb dus ossardets. Era femelha Caramelles damb dus ossardets (Boet e Smolet).

Pendent er an 2015 se detectèren tres enfantades. Ua de Caramellita damb tres ossardets, qu’un n’ei un mascle hilh de Pelut; encara cau determinar eth sèxe e era paternitat des auti dus. Ua auta enfantada siguec de Plume, damb Balou, e neishec un ossardet. Era darrèra, de Hvala, siguec formada per dus ossardets, hilhs de Pyros.

Ua bona notícia ei que Balou se podec reprodusir damb Plume abans de morir en 2014 a causa d’un pericle. Eth joen ossardet neishut ei ua esperança entath futura dera populacion deth nuclèu centrau. Poderie portar sang naua ara populacion d’ossi deth Pirenèu, amassa damb Goiat, er os liberat en junh de 2016. E era paternitat de Pepito (de 3 ans e miei) ei tanben ua erosa suspresa, pr’amor que normauments es mascles non se reprodusissen enquia que non an 5 ans o mès.

E pendent er an 2016 s’an detectat 5 enfantades segures, damb 10 ossardets, tot un recòrd enes Pirenèus enes darrèri 20 ans. dera analisi genetica des mòstres mos darà informacion entà poder establir quines femelhes son e quini son es mascles progenitors.